ന്യൂഡൽഹി: കരസേനാ മുൻ മേധാവി എം.എം. നരവനെയുടെ ഓർമക്കുറിപ്പുകളെച്ചൊല്ലിയുള്ള വിവാദം കനക്കുന്നതിനിടെ അദ്ദേഹം എഴുതിയ പുസ്തകം പ്രസിദ്ധീകരിച്ചോ ഇല്ലയോ എന്നതിൽ തർക്കം മുറുകി.
ലോക്സഭ പ്രതിപക്ഷനേതാവ് രാഹുൽ ഗാന്ധി പാർലമെന്‍റിൽ ഉയർത്തിക്കാട്ടിയ നരവനെയുടെ "ഫോർ സ്റ്റാർസ് ഓഫ് ഡെസ്റ്റിനി' എന്ന പുസ്തകം തങ്ങൾ പ്രസിദ്ധീകരിച്ചിട്ടില്ലെന്ന് പ്രമുഖ പ്രസാധക കന്പനിയായ പെൻഗ്വിൻ ഇന്ത്യ അവകാശപ്പെടുന്പോൾ പുസ്തകം ആമസോണിൽ ലഭ്യമാണെന്നു പറഞ്ഞ രാഹുൽ തന്‍റെ വാദത്തെ സാധൂകരിക്കാനായി 2023ൽ നരവനെ പുസ്തകത്തെ പരസ്യമായി അവതരിപ്പിക്കുന്ന ട്വീറ്റും ചൂണ്ടിക്കാട്ടി.
പ്രതിരോധമന്ത്രാലയം ഇതുവരെ പ്രസിദ്ധീകരിക്കാൻ അനുമതി നൽകാത്ത പുസ്തകത്തിന്‍റെ പകർപ്പവകാശമുള്ള പ്രസാധകർ തങ്ങളാണെന്നും പുസ്തകം പ്രിന്‍റ് രൂപത്തിലോ ഡിജിറ്റൽ രൂപത്തിലോ പൊതുജനങ്ങൾക്കു ലഭ്യമാക്കിയിട്ടില്ലെന്നുമായിരുന്നു പുസ്തകത്തിന്‍റെ പകർപ്പുകൾ വിവിധ വെബ്സൈറ്റുകളിൽ പ്രത്യക്ഷപ്പെട്ടതിനു പിന്നാലെ പെൻഗ്വിൻ ഇന്ത്യ പ്രസ്താവനയിൽ അറിയിച്ചത്.
പെൻഗ്വിന്‍റെ പ്രസ്താവനയ്ക്കു പിന്നാലെ രാഹുൽ സഭയിൽ ഉയർത്തിക്കാട്ടിയ പുസ്തകത്തിന്‍റെ ആധികാരികതയെപ്പറ്റി ചോദ്യങ്ങൾ ഉയർന്നതിനു പിന്നാലെയാണ് പുസ്തകം ആമസോണിൽ ലഭ്യമാണെന്ന് രാഹുൽ വ്യക്തമാക്കിയതും തന്‍റെ വാദം സത്യമാണെന്ന് തെളിയിക്കാൻ നരവനെയുടെ 2023ലെ ട്വീറ്റ് ചൂണ്ടിക്കാട്ടിയതും.
"ഹലോ സുഹൃത്തുക്കളേ, എന്‍റെ പുസ്തകം നിലവിൽ ലഭ്യമാണ്. ലിങ്ക് ഫോളോ ചെയ്യൂ' എന്നായിരുന്നു പുസ്തകം പ്രീ-ഓർഡർ ചെയ്യാനുള്ള കുറിപ്പോടെയുള്ള ഫോട്ടോയ്ക്കൊപ്പം നരവനെ ട്വീറ്റ് ചെയ്തിരുന്നത്. ഇതു ചൂണ്ടിക്കാട്ടി പെൻഗ്വിനാണോ മുൻ കരസേനാ മേധാവിയാണോ സത്യം പറയുന്നതെന്ന് നിങ്ങൾ തീരുമാനിക്കണമെന്ന് രാഹുൽ പറഞ്ഞു.
രാഹുലിന്‍റെ പ്രതികരണത്തിനു പിന്നാലെ, “പ്രീ-ഓർഡറിനായി ലഭ്യമെന്നു പറഞ്ഞാൽ പുസ്തകം പ്രസിദ്ധീകരിച്ചുവെന്ന് അർഥമില്ലെന്ന്” പെൻഗ്വിൻ ഇന്ത്യ പ്രസ്താവന പുറപ്പെടുവിച്ചു.
എന്നാൽ, പുസ്തകം വിദേശത്തു ലഭ്യമാണെന്നും അവിടെ പ്രസിദ്ധീകരിച്ചിട്ടുണ്ടെന്നും പുസ്തകത്തിന്‍റെ പകർപ്പ് പാർലമെന്‍റിൽ കൊണ്ടുവന്ന കഴിഞ്ഞ നാലിന് രാഹുൽ പ്രതികരിച്ചിരുന്നു. അതിനിടെ പ്രസിദ്ധീകരിച്ചിട്ടില്ലെന്ന് അവകാശപ്പെടുന്ന പുസ്തകത്തിന്‍റെ പകർപ്പുകൾ വിവിധ വെബ്സൈറ്റുകളിൽ പ്രത്യക്ഷപ്പെട്ടതിൽ ഡൽഹി പോലീസ് കേസെടുത്തിട്ടുണ്ട്.
Deepika
Corehub Solutions
E-paper LOGIN
LOGIN
